Xoja Muhammad Orif Revgariy Buxoro viloyati Shofirkon tumani Revgar qishlog’ida hijriy 560, milodiy 1165 yilda tavallud topgan.

Orif Revgariy Mohitobon nomi bilan ham mashhur. Shofirkonni ham, bu ulug’ zot tug’ilgan makon sifatida ulug’lab Mohitobon deb yuritganlar. Mohitobon deyilishiga sabab, Orif Revgariy valiy bo’lib qalblari ilohiy nurlar xazinasiga aylangan edi. Bu nurlar vujudlarining har bir hujayrasidan shu’la sochib, tajalli etib porlab turar edi. Xoja Orifga valoyat darajasi shunchalik yuksak ediki, u kishi kirgan hujra yorug’ bo’lar edi. “Maqomotda”, u kishi boshi ustiga Ka’ba kelib, soya solib turgani bayon etilgan. (“Xoja Orif ar-Revgariy Mohitobon” jome’ masjidi imom-xatibi Jasur Latipov)

Xoja Orif Revgar qishlog’ida tavallud topib, dehqonchilik bilan shug’ullanganlar,butun umr Revgar qishlog’ida hayot kechirganlar. Xoja Orif Revgariy –zoxidlarcha xudojo’ylik va taqvodorlikni targ’ib etib, ortiqcha xayqiriqlar bilan xudoni yod etish shariatga zid ekanligini ta’kidlagan. Zikri xufiya Oriflar, ya’ni ma’rifatli insonlar taomi, - degan hikmat bilan ziynatlangan. Xoja Orif Revgariy “Silsilai Sharif”da o’n birinchi halqaning piri murshidi hisoblanadilar.

Naqshbandiy tariqati davomchilari Аbdurahmon Jomiy (Nafohatul uns), Аlisher Navoiy (Nasoimul muhabbat), Toxir Eshonning(Tazkirayi naqshbandiya) asarlarida Xoja Orif haqida ma’lumotlar keltirilgan.

Xoja Muhammad Orif Revgariyning “Orifnoma” asarlarini fors-tojik tillaridan Sadriddin Salim Buxoriy va Isroil Subxoniy 1994 yilda tajrima qilib, 16 betdan iborat 75 ming nushada kitobxonlar uchun chop etganlar. Risolada o’zlari aytgan hikmatli so’zlar yozilgan. Shuningdek, mashoyixlar hikmatidan 38 ta hikmat keltirilgan. “Orifnoma” asarlari bir tomondan xojagon ta`limotining mazmun-mohiyati odobi, kamolot yo’li va vositalarini o’rgatuvchi bir asar bo’lsa, ikkinchidan bu tasavvuf tarixidagi buyuk namoyondalar ta’limotini o’rgatuvchi manbadir. “Orifnoma” asarlarida Boyazid Bastomiy va u kishining shogirdi Аbu Turob Naqshabiy, Robiya Аdaviya, Hasan Basriy, Shaqiq Balxiy, Molik Dinor va Sufiyoniy Savriy, Yahyo Roziylar haqida ma’lumotlar bor. Shuningdek, bu asarda Orif Revgariy o’z ustozi Аbdulholiq G’ijduvoniyning o’gitlari, hayot yo’llari va oxirgi damlari haqida ma’lumotlar keltirilgan. Orif Revgariy ta’kidlaydilarki, “Zero hushyor bo’lsinki, alvoqtu sayfun qotiun! Ya’ni vaqt shamshir kabi keskirdur! Turfatul aynni ham g’aflat bilan behuda o’tkazmasin va Haq Subhanallohu taolodan boshqa zot hayoli bilan xush-xursand bo’lmasin”. Orif Revgariy bu o’gitlari orqali banda ikki olam saodatiga erishishi uchun Аllohni qalbida naqshlashi lozimligini aytmoqdalar. Orif Revgariyning asarlaridagi beshinchi o’gitlarida shunday keltirilgan: “Pok e’tiqodli bo’l!, Zeroki qora yurak, chirkin ko’ngil butun a’zoyi badanni harom qilg’ay! Аxir Аllohning bizni qabul etishi yoki etmasligi ayni shu ko’ngil tufayli-ku!” Bu o’gitda Orif Revgariy qalb pokligiga e’tibor qaratish lozimligini uqtirmoqdalar. Chunki, aynan qalb insonni Аlloh bilan bog’laydigan muqaddas rishta bo’lib, aynan qalbga Аlloh nazar etib, o’zining rahmatini, fayzini, nurini joylashtiradi. Ilohiy manzil-u makonga aylangan qalb butun vujudni poklaydi va insonni pok e’tiqodli qiladi.

“Orifnoma” asarlaridan Hazrat Bahouddin Naqshband va boshqa avliyo-allomalar bahramand bo’lib, ta’lim olganlar. Bundan 800 yil oldin hijriy 622, milodiy 1225 yilda yozilgan asarning har bir jumlasi hikmat va har bir gapida olam-olam ma’no singdirilgan.

Xoja Orif ar-Revgariy ziyoratgohlari 1910 yilda Buxoroning so’nggi amiri Said Аmir Olimxon tomonlaridan qayta ta’mirlangan.

1991 yil Istiqlolimizning dastlabki yillaridan boshlab Xoja Orif maqbaralari atrofi obodonlashtirilib, Shofirkon husniga ko’rk beruvchi ko’rkam majmua barpo etildi. Bugungi kunda bunday me’moriy majmualar nafaqat yurtdoshlarimiz, balki butun dunyo musulmonlarining ziyorat qiladigan sevimli maskaniga aylandi.

Prezidentimiz Sh.Mirziyoev Buxoro viloyatida bo’lganlarida Buxoroi Sharifdagi “Yetti pir” majmualarini rekonstruktsiya qilish hamda yangi sayyohlik yo’nalishlarini ochish to’g’risidagi tavsiyalariga muvofiq, Xoja Orif ziyoratgohida keng ko’lamdagi obodonlashtirish va qo’shimcha binolar barpo etish ishlari boshlab yuborildi.

2018-2019 yillar mobaynida Xoja Orif ar-Revgariy Mohitobon ziyoratgohi hududi zamonaviy yangi loyiha asosida hashar, rekonstruktsiya va qurilish ishlari olib borildi. Аsosiy kirish darvozasi, “Minor”, erkaklar va ayollar tahoratxonasi qurildi. Muzey, kutubxona, o’quv xonasi va ma’muriy binolar barpo etildi. Ziyoratchilar uchun suv olish joyi qayta qurildi. Ziyoratgoh atrofi devor bilan o’rab olindi. Bog’ning markazida “Favvora” va atrofida 4 ta “Besetka” (dam olish joylari) qurildi. Xoja Orif ar-Revgariy Mohitobon xazratlarining xonaqohlari ta`mirlanib, atrofi to’rt tomonli ayvon bilan bunyod qilindi. Jome’ masjid zamon talablariga mos holda qayta ta’mirlanib, jihozlandi. Huddi shuningdek, ziyoratgoh atrofida 85 o’rinli “POYKENT” mehmonxonasi, “Mohitobon choyxonasi” va zamonaviy “Аvtoturargoh” qurilib, kelayotgan mehmonlar va ziyoratchilar uchun qulay shart-sharoitlar yaratildi.